اس میں پہلا مشکوک واقعہ تو اے آر ڈی سے اچانک بیشتر اتحادی جماعتوں کا انخلا تھا۔ بغیر کسی وارننگ کے پیپلز پارٹی کو چھوڑ کر حزب مخالف کی باقی جماعتوں نے ایک نیا اتحاد (اے پی ڈی ایم) بنا لیا۔ آخر ایک دم سے ایک نیا اتحاد وجود میں کیسے آ گیا؟ اور اس کی ضرورت کیا تھی؟

نواز شریف نے بڑے اعتماد سے کہہ دیا کہ اے آر ڈی ختم ہو گئی ہے۔
نئے اتحاد میں ہے کون؟ وہی سیاسی لوگ جو کہ انیس سو نوے کے انتخابات میں پیپلز پارٹی کو شکست دینے کے مقصد کے لیے بنائی گئی اتحاد آئی جے آئی میں شامل تھے۔ بس اس میں ایک نئی پارٹی عمران خان کی ہے، لیکن وہ بھولے صاحب کچھ سال کے تجربے کے باوجود اس پورے سیاسی کھیل کو سمجھ نہ سکے ہیں۔

آئی جے آئی کی یہ نئی شکل مل کر انتخابات لڑے گی۔ معلوم ہوتا ہے کہ اس نئے آئی جے آئی کے پیچھے بھی وہی قوتیں ہیں جو پرانے اتحاد کے پیچھے تھیں، یعنی فوج کا ایک مخصوص فوجی ادارہ۔

فرض کیجیے آئی ایس آئی مولویوں اور باقیات کی حمایت کر رہی ہے اور اس اتحاد اس کا قیام اس ہی کا منصوبہ تھا، تو پھر کیا بے نظیر مشرف مذاکرات بھی اسی گیم کا حصہ ہے؟
یہ بھی ایک مشکوک قسم کا سلسلہ ہے۔ ہفتوں سے چل رہا ہے اور حکومتی ذرائع اس بارے میں چھوٹے چھوٹے پٹاخے چھوڑتے رہتے ہیں۔ ساتھ پورے میڈیا میں بےنظیر کے نام کو ڈیل کے ساتھ جوڑ کر اس کی سیاسی ساکھ کو نقصان پہنچایا جا رہا ہے۔ ’ڈیل‘ کو میڈیا نے بالکل ایسا موضوعِ بحث بنا دیا جس طرح زرداری کرپشن سکینڈلز اور مرتضی بھٹو قتل کیس۔ دونوں مرتبہ میڈیا کو استعمال کر کے ایک ایسا ماحول بنایا گیا جس میں پیپلز پارٹی کی حکومت بدنام ہوئی۔

کیا جنرل مشرف واقعی ان مذاکرات میں مخلص ہیں یا پھر یہ بھی ایک ہی گیم کا حصہ ہے؟

کیا جنرل مشرف اور بے نظیر دونوں ہی اس گیم میں استعمال ہو رہے ہیں اور آخیر میں دونوں ہی بدنام ہو جائیں گے؟ کیا ملک اس نئے آئی جے آئی کے حوالے کر دیا جائے گا؟

گیم ہے کیا؟ اتحاد میں فائدہ کس کو ہو رہا ہے اور نقصان کس کو؟ آپ کا کیا خیال ہے؟