گمشدہ دوست کے نام
سرسری سماعت کی فوجی عدالت سے
پندرہ کوڑوں کی سزا کے نشانات
تمہاری پشت پر آمروں کے لکھے ہوئے کسی آٹو گراف کی طرح آج بھی موجود ہیں
کوڑا کہ جسے تمہیں مارنے کے لیے ہٹا کٹا جلاد گھوم کر ہوا میں لہراتا ’اللہ اکبر‘ کا نعرہ مارتا
اور تم ہر کوڑا اپنی پیٹھ پر سہتے ہوئے اس دھرتی کا شکر ادا کرتے جس سے عشق کی پاداش میں تمہاری ننگی پشت ٹکٹکی پر سجی تھی۔
وہ تارا مسیح کا عہد تھا جس میں ہم زندہ تھے
یہ بھی تارا مسیح کا عہد ہے
گھپ اندھیری تیز ہواؤں والی رات میں دور سے آتا ہوا وہ قہقہہ تمہیں یاد ہوگا جسے تم ایف یو جنرل!‘ کہتے
ہاں تم نے ٹھیک پہچانا وہ قہقہہ ’ایم کے‘ کا تھا، وہ اس پر لعنت بھیجتا تھا کہ اسے باغوں سے مری ہوئی تتلیاں جمع کرکے انسیکٹ باکس میں سجانا ہوتی تھیں
(میرے گھر کے دروازے کے باہر سیڑھی پر کئي دنوں سے ایک مری ہوئی کئي رنگوں والی تتلی کی لاش پڑی ہے۔ میرا بیٹا اس سیڑھی پر سے سنبھل کرگزرتا ہے اور مجھے ایم کے اور تم یاد آگئے ہو۔)
لالی، تم مجھے ہیمشہ الٹی پتلون پہنے پکڑ لیتے، منٹو کی طرح تم نے بھی ایک کہانی لکھی تھی’الٹی شلوار‘
شکاگو کے راستوں پر رات بھر ٹیکسی چلاتے تم مجھے اس بوڑھے سے اپنی عشق کی داستانیں سناتے جسکا نام تم نے اپنے بیٹے پر رکھا ہے،
'’ہم بریگیڈئیر سرور کے بندے ہیں، آصف کا شناختی کارڈ اور پاسپورٹ لینے آئے ہیں‘ سنا تم نے
وہ تمہیں بھی جہادی کہہ رہے رہیں، نیور مائنڈ انہوں نے ٹارچر کے نئے طریقے ایجاد کرلیے ہیں،
تم اب گلبدن سے ’گلبدین‘ بنا دیئے گئے ہو
قاتل مسیحا ہو چلا ہے،
اب نہ پوچھنا کہ مسولِنی مرد تھا یا عورت؟
تبصرےتبصرہ کریں
حسن بھائی، کيا کہنے ’اب تم گلبدن سے گلبدين بناديئے گئيے ہو‘، ’قاتل مسيحا ہوچلا ہے‘، ’اب نہ پوچھنا کہ مسولنی مرد تھا يا عورت‘ اب مجھے آپ سے بھی خوف آنے لگا ہے کہيں اس دھرتی سے بے پناہ پيار کے جرم آپ بھی نہ دھر ليے جاؤ۔ پھر نہ کہنا کہ ہميں خبر نہ ہوئی۔ اب شايد کوڑے نہيں برسائے جاتے۔ شايد اب لوگوں کو غايب بھی نہ کيا جائے۔ خير انديش
برادرم حسن مجتبٰی، پہلے سے موجود بےحد احترام ميں اور اضافہ ہو گيا۔ خدا اپنے نام پر بننے والی دھترتی کے پيار ميں کوڑے کھانے والوں کو کيا اجر دے گا مجھے کچھ اندازہ نہيں۔ اس دھرتی کی محبت ميں ميں ہم آشفتہ سروں نے
وہ قرض اتارے ہيں کہ واجب بھی نہيں تھے (شعر ميں غلطی پر معاف فرما ديجيۓ گا)
کل کا تارہ مسيح لا علم تھا کہ اس نے کس گوھر باياب کو پھانسی دی، آجکا تارہ مسيح کھلی آنکھوں اور روز روشن ميں اپنی مزدوری سرانجام دے رہا ہے۔
حسن مجتبی صاحب! ذو معنی جملوں پر مبنی بلاگ ايسا ہی ہے کہ کچھ نہ سمجھے خدا کرے کوئي۔ آپ سے معذرت کے ساتھ عرض ہے کہ آپ نے عصر حاظر کی نئی نسل کو کھل کر کيوں نہ بتايا کہ آپ مرد مومن مردحق بلکہ حضرت اميرالمومنين کے ضيائی مارشل لا کی بات کررہے ہيں۔ تارہ مسيح تو بے چارا يونہہ ہی بدنام ہوگيا بلکہ تاريخی طور پر بدنام ہے، اصل کرتوت تو اصلی تے وڈی سرکار کے تھے۔ بحرحال اس بلاگ سے عمومی قارئين کے بجائے آپکے دوست محظوظ ہوئے ہونگےـ آپ کے اس جری و بہادر دوست کی عظمت کو سلام!
حسن صاحب، يہ سب باتيں ايک ايسے مُلک ميں ہُوئی تھيں اور ہو رہی ہيں جسے ہم نے اسلام کے نام پر حاصل کيا تھا اورآج اسلام کے اصُولوں کی پامالی بھی بہت کُھل کر کر رہے ہيں۔ يعنی ہم ہر کام کُھل کُھلا کر اور کُھلے دل سے کرتے ہيں، کوڑوں کے وقت کوڑے اور جس وقت جو بات بر وقت نا ہو وہ کر ليتے ہيں اسی کا نام آزادی ہے۔دعاگو
روزنامہ جنگ ميں سنٹرل جيل کراچی سے سردار عطااللہ مينگل صاحب کا ايک خط تين قسطوں ميں شائع ہوا ہے جسے پڑھ کر شرم سے سر جھک جاتا ہے۔ بلوچستان اور بلوچ قوم سے ميري واقفيت سردار شير باز مزاري صاحب کي کتاب A Journey to Disillusionment
سے ہوئی جس کے بعد ميں بلوچ قوم، سردار شيرباز مزاری اور سردار عطاللہ مينگل صاحب جيسے کھرے اور با اصول قائدين کا بے حد احترام کرتا ہوں جن کي ديانتداري کا اعتراف ان کے مخالفين نےبھي کيا ہے۔ خدا ان کے ساتھ ہم سب پہ طاري اس ظلم و جور کي شب کا خاتمہ عطا فرمائے۔ اِس ضمير فروش دور ميں جوان بيٹوں کي قربانيوں سميت کٹھن ترين حالات ميں بھي ان بزرگوں کا صبر و استقامت ديکھ کرمجھے تو وہ پاک ہستياں ياد آ جاتی ہيں جن کا ميں نام ليوا ہوں۔
جناب حسن صاحب آپ ھميشہ دکھتی رگ پر ہاتھ رکھتے ہيں۔ يہی تو الميہ ہے ہماری قوم کا جسے ہم ساٹھ سالوں سے بھگت رہے ہيں۔ ياستدانوں ميں اکثرلوگ ذاتی مفاد کے لۓ فوجی آمروں کی حمايت کرتے ہيں تو جناب اس طرح تو ہوتا ہے اسطرح کے کاموں ميں
خدا نے آج تک اس قوم کي حالت نہيں بدلي
نہ ہو جن کو خيال خود اپني حالت کے بدلنے کا
sajjad hussain dubai
جس کی لاٹھی اس کی بھينس۔ ہمارے پيارے ديس ميں ہرن سے منوا ليا جاتا ہے کہ اس نے ہاتھی کو اغوا کيا ہے۔ اب تو حيران بھی نہيں ہوا جاتا کہ يہ کيا ہوا ہے؟ سب نارمل ہے۔ عمر شريف کا ايک ڈائیلاگ ذہن ميں آتا ہے کہ ’ميرے کو ٹينشن چاہيے‘۔
پاکستان ميں ھر دور تارا مسيح کا دور رھا ھے مجھے جنرل ضيا کے دور سے آج تک کسي حکمران ميں کم سے کم انسانيت نظر نہ آئي۔ سب نے عوام کا جي بھر کے استحصال کيا بلکہ قتل عام کيا، چاھے ضيا دور کے سرکاري سرپرستي ميں فرقہ ورانہ فساد ہوں، کراچي ميں سندھ ميں لساني قتل عام ھوں، نواز شريف کے دور ميں مساجد و امام بارگاھوں ميں بم دھماکے ھوں، فائرنگ ھو يا بےنظير کے دور ميں سرکاري سر پرستي ميں ايک جنرل کراچي کے نوجوانوں کو ھزاروں کي تعداد ميں تہ تيغ کرے۔ آمر ھوں يا جمہوري حکمران، پاکستان ميں اپنے مفاد کے لئے سب جاپان پر بم گرانے والے روز ويلٹ يا مسوليني سے کم نہيں ھيں۔ مفاد پرست مفاد پرست ہوتا ھے مرد يا عورت نہيں۔