Cadair deilwng i dri ar ddeg
Un deg tri sydd wedi ymgeisio am y Gadair yn Eisteddfod Wrecsam eleni - ac fe all pa un bynnag ohonyn nhw wnaiff ennill gyfrif ei hun yn ffodus o'i gadair.
Mae'r gadair yn un hynod o hardd ac yn rhodd gan
Gwmni Teithio Seren Arian, sydd, fel mae cyd-ddigwyddiad yn mynnu, a'i brif swyddfa yn - 13 Y Maes, Caernarfon!
Dim ond gobeithio na fydd yr holl dri ar ddegau yna yn felltith ac y bydd yna enillydd - yn enwedig o gofio mai dyma'r nifer fwyaf i gystadlu am y Gadair ers eisteddfod Yr Wyddgrug, 1991.
O'i chymharu ag ambell i gadair ddiweddar y mae'n fwy traddodiadol ei gwedd ond yn drawiadol serch hynny
Mae gan Wrecsam eitha traddodiad o gadeiriau trawiadol yn bennaf honno a waned yn China ar gyfer Eisteddfod 1933 wedi ei rhoi gan y Dr John Robert Jones, bargyfreithiwr llwyddiannus yn Shanghai.
Yn frodor o Lanuwchllyn bu farw yn Hong Kong yn 1976.
Comisiynodd ef grefftwyr o gartref plant amddifad Catholig yn Shanghai i wneud y gadair ac un arbennig oedd hi hefyd mewn coedyn du, du, a chyda phob math o addurniadau.
Er nad mor addurniadol mae cadair 2011 - gyda phedwar gwahanol goedyn ynddi; cedrwydd, sycamor, Wenge Affricanaidd a derwen Gymreig o gaeau'r Rhiwlas, Y Bala - yn diogelu traddodiad Wrecsam o gadeiriau gwerth chweil.
Mae gan Wrecsam hefyd, wrth gwrs, draddodiad o eisteddfodau dwbwl ac mae dyfalu yn barod ai'r un bardd fydd yn ennill y gadair a'r goron yno eleni eto gan efelychu camp Syr T H Parry-Williams a Donald Evans yn y dref.
Byddwn hanner ffordd at wybod hynny ddydd Llun - dim ond gobeithio nad oes arwyddocâd i'r triarddegau 'na.
