³ÉÈË¿ìÊÖ

Dydd Mercher
Braf iawn oedd cael gair hefo Elin Kelly bore ma o Ysgol Gyfun Rhdywaun yng nghystadleuaeth yr unawd telyn.

Dyma'r tro cyntaf iddi fod ar y llwyfan mawr a'r peth cyntaf ddywedodd hi ar ôl dod oddi yno oedd ei bod hi isio mynd nôl eto! Mae brwdfrydedd y cystadleuwyr 'ma yn heintus.

O Affrica
Un o uchafbwyntiau'r dydd i mi oedd cyfarfod Temalangeni Diamni o Ysgol Uwchradd Eifionydd.

Roedd hi'n cystadlu ar y llefaru i ddysgwyr blwyddyn 7-9. Symudodd o Affrica bum mis yn ôl ac fe lwyddodd i ddysgu Cymraeg o fewn wyth wythnos!!

A dyma hi heddiw ar lwyfan cenedlaethol yr Urdd. Merch arbennig iawn, a thalentog gan ei bod hi hefyd yn arfer chwarae pel fasged i dim cenedlaethol Swasiland.

Tair ysgol fach
Cystadleuaeth dda oedd yr un i bartion cerdd dant (adrannau) a thair ysgol fechan ar y llwyfan sef Adran y Parc, Adran Bentref Ysbyty Ifan ac Adran Llangwm.

Roedd na gryn emosiwn gefn llwyfan oherwydd bod dyfodol yr ysgolion hyn yn y fantol, ac fe welwyd hynny ar y llwyfan hefyd wrth i Eryl Roberts - sy'n rhiant yn Llangwm neidio ar y llwyfan gyda dau arall i dynnu sylw'r gynulleidfa at sefyllfa'r ysgolion hyn a galw am gefnogaeth yr Urdd

Ffliwtio
Nia Elizabeth Pugh o Adran Brithdiwr ddaeth i'r brig ar yr Unawd Chwythbrennau bl 7-9. Ar hyn o bryd mae hi'n ddisgybl yn Ysgol Gerdd Chethams ym Manceinion ac yn dychwelyd adref am benwythnos ar ôl cyfnod o dair wythnos yno ar y tro.

Y ffliwt ydi ei offeryn hi ond roedd hi mewn dipyn o bicil bore ma - oherwydd bod y ffliwt yn sticio! Diolch byth - roedd ei hen ffliwt ar gael ac fe gafodd y wobr gyntaf!

Llywydd

Caryl Lewis oedd llywydd y dydd heddiw. Mae'n debyg iddi gystadlu'n unigol yn yr Urdd pan oedd hi'n saith oed ond heb gael llwyfan. Pwy oedd y beirniad y diwrnod hwnnw? Neb llai na'i mam yng nghyfraith erbyn hyn!

Maenclochhog
Mae enw Adran Maenclochog yn enw cyfarwydd iawn ar ddydd Mercher Eisteddfod yr Urdd ac oedd - roedd na gynrychiolaeth dda yma eto eleni. Mae Marlyn Lewis wedi hyfforddi cannoedd o'r plant yno, ond braf iawn oedd gweld dau ifanc sydd hefyd wedi cael blas ar hyfforddi - sef Angharad Edwards a Sion Jenkins.

Mae'r ddau yn ddwy ar bymtheg oed a nhw oedd yn gyfrifol am y grwp llefaru.