O mai God - gweddïwn
Awgrymodd cyfaill mai'r agosaf mae llawer o bobl yn dod at weddïo y dyddiau hyn yw ebychu "Oh! My God! pan fo rhywbeth yn peri syndod iddyn nhw.
Dydw i ddim yn siwr sut mae hynny'n sgwario â Huw Ceredig yn cyfaddef ar y radio dro'n ôl ei fod ef er wedi cefnu ar grefydd yn dal i ddweud ei bader bob nos.
"Dwi'n ystyried fy hun yn ddyn crefyddol. Dwi'n dweud fy mhader bob nos - dwi ddim yn siŵr at bwy . . ." medda fo mewn sgwrs gyda Dewi Llwyd ar Radio Cymru.
Hel rhyw feddyliau fel yna oeddwn i o glywed am lyfr newydd sydd wedi ei gyhoeddi, Mil a Mwy o Weddïau wedi eu casglu gan Edwin C Lewis - awdur llyfr arall o'r enw Mil a Mwy o Ddyfyniadau a gyhoeddwyd dair blynedd yn ôl.
Wrth sôn am ei lyfrau ar y rhaglen radio Bwrw Golwg echdoe dyfynnodd y Dr Lewis un o'i hoff weddïau ef o blith y mil a mwy.
Un gan y diweddar Cyril Williams o adran Diwinyddiaeth Prifysgol Llambed.
Gweddi daclus o bymtheg gair - a hynny'n rhinwedd ynddo'i hun:
"O ran y gwelwn o Arglwydd; maddau i ni am ystyried mai'r rhan yw'r cyfan."
Pa un yw eich hoff weddi chi tybed? Anfonwch air.
