³ÉÈË¿ìÊÖ

"Yn dilyn cyhoeddiad diweddar gan Lywodraeth Cynulliad Cymru bod arian ychwanegol wedi'i glustnodi ar gyfer swyddi golygyddion creadigol cyfrwng Cymraeg, fe fydd nifer o swyddi newydd yn y diwydiant cyhoeddi'n cael eu hysbysebu'n fuan.

"Rydym yn croesawu'r buddsoddiad pellach yma yn fawr iawn; mae'n newyddion ardderchog i'r byd cyhoeddi," meddai Elwyn Jones, Cyfarwyddwr Cyngor Llyfrau Cymru.

Dywedodd ei fod yn arwydd o hyder Llywodraeth y Cynulliad yn y fasnach lyfrau.

Ond dim cweit cymaint o hyder yng ngalluoedd sgrifennu awduron o bosib!
Y fi sy'n dweud hynny gyda llaw, nid y Cyngor Llyfrau.

Mae'r Cyngor yn ei weld "yn gymorth mawr i gryfhau isadeiledd y diwydiant."

"Fe fydd hefyd yn sicrhau swyddi mewn ardaloedd gwledig lle mae nifer o'r cyhoeddwyr wedi'u lleoli," meddai Elwyn Jones.

'Yn y blynyddoedd diwethaf rydym wedi gallu sicrhau arian ychwanegol i awduron gan gynorthwyo rhai o'n prif awduron i ysgrifennu llyfrau amrywiol ac apelgar sydd wedi cael croeso brwd gan y darllenwyr. Mae'n gyfle yn awr i ni fuddsoddi yn yr ochr olygyddol er mwyn parhau i sicrhau deunydd o'r safon uchaf," meddai.

Croesawu
Croesawyd y datblygiad gan Myrddin ap Dafydd, Cadeirydd Cwlwm Cyhoeddwyr Cymru hefyd a pherchen un o'n gweisg prysuraf, :

"Mae crefft y golygydd mor bwysig wrth bontio rhwng yr awdur a'r cyhoedd - mae'n sicrhau llyfrau mwy llyfn a darllenadwy. Bydd y gweisg yn cyd-fuddsoddi yn y cynllun hwn er mwyn codi'r farchnad llyfrau Cymraeg i dir uwch eto," medda fo.

Tair cangen
Cyfeiriodd y Gweinidog diwylliant, Alun Ffred Jones, at dair elfen yn y datblygiad:

"Fe fydd y golygyddion newydd hyn yn cyfrannu at wella ansawdd llyfrau, cynyddu'r gwerthiant a gwella profiad y darllenwyr," meddai.

Mae rhai hysbysebion wedi ymddangos yn y wasg yn barod ac mae'n ymddangos y bydd rhagor neu fe ellir cysylltu ag Adran Grantiau y am ragor o wybodaeth am y cynllun.