Cymuno o'r lleuad
Er cymaint yr hel atgofion fu yna am ddyn yn cyrraedd y lleuad ddeugain mlynedd yn ôl welais i neb yn cyfeirio at un peth braidd yn annisgwyl yr aeth Edwin Aldrin gydag ef i'r lloer.
Aeth ef â thamaid o fara cymun gydag ef.
Ac yntau'n flaenor yn Eglwys Bresbyteraidd Webster yn Houston, a'i wraig a'i dri o blant yn aelodau yno, aeth ef â darn o'r bara a ddefnyddiwyd mewn cymun cyn iddo ymadael.
Y bwriad oedd creu undod symbolaidd rhwng y gofodwr a'i gyd aelodau unwaith y cyrhaeddai'r lleuad.
Offrymwyd gweddïau am lwyddiant Apollo-11 ym mhob un o eglwysi'r Ganolfan Ofod yn Houston gyda gwraig Michael Collins a'u plant yn dathlu'r offeren yn Eglwys Gatholig Sant Paul.
Ond priod Neil Armstrong a'r plant yn cynnal eu "defosiwn" hwy mewn ystafell wely yn eu cartref wedi ymneilltuo am ychydig oddi wrth wahoddedigion oedd yno'n dathlu'r daith.
Ac yn y TÅ· Gwyn gyda'r Arlywydd Nixon yn bresennol darllenwyd deg adnod gyntaf Genesis gan y Cyrnol Borman a ddarllenodd yr un adnodau pan oedd lloeren Apollo-8 y gofalai amdani yn cylchu'r lleuad noswyl y Nadolig cynt.
Rhyfedd. Yng nghanol yr holl wyddoniaeth a hyder yng ngalluoedd dyn gwelwyd yr angen i chwilio hefyd am gymorth galluoedd na all yr un gwyddonydd eu hegluro.
