���˿���

Y rhesymau pam fod graffiau mor bwysig yw eu bod yn darparu ffordd i ddelweddu data sy'n hawdd ei deall. Yn aml gall pobl adnabod tueddiadau a phatrymau wrth edrych ar graff na fydden nhw'n gallu eu gweld wrth edrych ar dabl o rifau.

Mae'n bwysig dy fod yn gallu adnabod patrymau a thueddiadau mewn data graffigol a deall a defnyddio termau mathemategol allweddol wrth i ti ateb unrhyw gwestiynau.

Mewn mathemateg, mae yna dair ffordd allweddol y gallwn ni ddisgrifio tuedd mewn graff fel y mae'r tri graff gwasgariad hyn yn dangos:

Cydberthyniad positif – wrth i un newidyn gynyddu mae'r llall yn cynyddu hefyd.

Cydberthyniad negatif – wrth i un newidyn gynyddu mae'r llall yn lleihau.

Dim cydberthyniad – wrth i un newidyn gynyddu nid oes unrhyw effaith ar y llall.

Yn ogystal â bod yn gallu nodi'r cydberthyniad, hefyd mae'n rhaid i ni fod yn gallu disgrifio ac esbonio siâp y graff.

Llinell syth

Mae hyn yn golygu bod y berthynas rhwng y ddau newidyn yn llinol. Serthrwydd y llinell yw'r graddiant. Mae'r graddiant yn dweud wrthym ni beth yw'r gyfradd newid - pa mor gyflym mae un newidyn yn newid o'i gymharu â'r llall.

Mae graddiant mwy serth yn golygu cyfradd uwch o newid.

Cromlin i fyny

Mae'r gromlin hon yn dweud wrthym ni nad yw'r berthynas yn llinol a bod y gyfradd newid yn cynyddu.

Cromlin i lawr

Eto, mae'r gromlin hon yn dweud wrthym ni nad yw'r berthynas rhwng y ddau newidyn ar yr echelin yn llinol, fodd bynnag y tro hwn mae'r gyfradd newid yn lleihau.