���˿���

Data ansoddol

Mae brasluniau maes yn fath defnyddiol o ddata ansoddol. Maen nhw’n ein helpu i gofio lleoedd rydym wedi ymweld â nhw.

Sut i wneud braslun maes

Gall pawb wneud braslun maes – does dim angen sgiliau artistig. Mae gwneud braslun maes yn broses syml:

1. Nodi’r dirwedd y mae angen ei braslunio.
2. Ysgrifennu teitl a fydd yn ein helpu i leoli’r braslun, ee ‘Safle 1’.
3. Defnyddio pensel i amlinellu prif arweddau’r dirwedd, ee bryniau a dyffrynnoedd neu adeiladau a ffyrdd.
4. Ychwanegu manylder i’r braslun i gofnodi rhagor o wybodaeth, ee arweddau afon, fel ystumiau, clogwyni afon a dyfroedd gwyllt. Does dim angen tynnu llun pobl os nad ydyn nhw’n bwysig i’r cwestiwn ymholi.
5. Anodi neu labelu’r braslun maes i roi rhagor o wybodaeth am y dirwedd a’r amodau, ee sut oedd y tywydd?
6. Fe allet ti dynnu llun camera i gefnogi’r braslun maes, neu ddefnyddio ap sy’n caniatáu i rywun anodi ffotograffau yn y maes.

Data meintiol

Mae data meintiol yn aml yn dod ar ffurf rhifau.

Mathau o ddata meintiol

Mae’n bosibl mesur llawer o wahanol bethau wrth wneud gwaith maes, er enghraifft cyflymder afon, nifer y ceir neu swm y sbwriel.

Gall rhifau ymddangos mewn ffurfiau eraill hefyd:

• Data enwol – rhifau sy’n ymddangos fel categorïau yw’r rhain, ee 1 = oes a 2 = nac oes.
• Data trefnol – mae gan y rhifau hyn drefn, ee dinasoedd wedi’u trefnu yn ôl maint y boblogaeth. Rydym yn gwybod bod dinas 1 yn fwy poblog na dinasoedd 2 a 3, ond nid ydym yn gwybod faint mwy o bobl sydd yno, gan nad yw’r bwlch rhwng pob dinas yn hafal.
• Data cyfwng – mae’r rhifau hyn yn debyg i ddata trefnol, ond mae’r gwahaniaeth rhwng pob rhif yn hafal, ee mae tymheredd yn cael ei fesur mewn canraddau.
• Data cymhareb – mae cysylltiad rhwng dwy set o rifau, ee nifer y bobl i bob meddyg.